Mae Awdurdod Heddlu De Cymru yn cwmpasu saith ardal Awdurdod Lleol, sef Pen-y-bont ar Ogwr, Caerdydd, Merthyr Tudful, Castell-nedd Port Talbot, Rhondda Cynon Taf, Abertawe a Bro Morgannwg.
Rydym yn gofalu am ardal ddaearyddol gymharol fach - dim ond 10% o Gymru, ond rydym yn gyfrifol am blismona dros 50% o gyfanswm poblogaeth Cymru – tua 1.2 miliwn o bobl.
Hefyd, mae De Cymru yn denu dros 25 miliwn o ymwelwyr bob blwyddyn ac yn llwyfannu 100 o ddigwyddiadau mawr yn flynyddol.
Mae’n ardal blismona unigryw
Mae De Cymru yn ardal amrywiol, gydag ardaloedd trefol, gwledig ac arfordirol.
O fewn ein ffiniau mae gennym ddwy ddinas fawr - Abertawe a Phrifddinas Cymru, Caerdydd.
Mae Abertawe yn gartref i borthladd fferi, Clwb Pêl-droed Abertawe sy’n chwarae yn y Bencampwriaeth a Thîm Rygbi Rhanbarthol y Gweilch.
Caerdydd yw un o’r dinasoedd sy’n tyfu gyflymaf yn Ewrop, mae’n gartref i Gynulliad Cenedlaethol Cymru, Stadiwm y Mileniwm byd-enwog, maes awyr rhyngwladol, Clwb Pêl-droed Dinas Caerdydd sy’n chwarae yn y Bencampwriaeth a Thîm Rygbi Rhanbarthol Gleision Caerdydd.
Yn ogystal â’n hardaloedd trefol mawr, mae gennym ardaloedd cymoedd byd enwog Rhondda, Cynon a Taf sydd wedi gweld newid cyflym yn y deng mlynedd ar hugain diwethaf.
Mae ein ffin ddeheuol i gyd yn arfordir ac yn cynnwys porthladdoedd y Barri, Pot Talbot ac Abertawe ynghyd â chyrchfannau ymwelwyr poblogaidd Porthcawl, Y Mwmbwls a Phenrhyn Gwyr.